حلقت باص بنات الـ2008

كتبها درايفر ، في 25 يونيو 2008
الساعة: 13:30 م







اعتذر قبل كل شي لكل من مر من هنا ولا لقا الحلقات الجديده







عشان نربط الاحداث ببعض ، ونحاول نرقع اللخبطه اللي صارت

واللي حتى انا اضطريت معها اني ارجع واقرى بعض الاحداث

وبما ان المخ ما عاد يستوعب شي ، لازم اسوي استعاده للاحداث الرئيسيه

في القصه ،

….

دلال تزوجت محمد وسافروا لكندا ، وسوسن الدبا صارت نحيفه بعد العلاج الطبيعي

والحين تغيرت حياتها بعد فكرة خالد صديق محمد عشان يعوضها عن اللي سواه فيها

.

دله وباسكال على حطة ايدكم ما تغيروا ، الا ان دله تفكر تترك المدرسه

وباسكال احترفت الطق وصارت تجيها عروض اعراس بكثره

.

ملاك وجعيفر ( الحب العذري )

ذولا يارب يتزوجون باسرع وقت ويروحون شهر عسل في تايلند ويختفون هناك في جزيره

( عيش سفاري ) ما احد يعرف لهم طريق ، طفشوني هم وعرسهم كل يوم مشكله

.

البرنسيسه ما يحتاج ، ظبطت عمرها ، ماهي هينه ذالبنت بديت اخاف على نفسي منها

الله يستر ..

.

ام خليف ( ايش شكله ) ، الى الحين حاس ان راسها فيه تنسيم وباقي ما طابت

من اللي سحرها ، باقي ما صار شي في مشروعها اللي قررت تسويه

وتحطني مدير عليه ، طبعا مشروع باصات لنقل الطالبات

.

…………………..

( في بيتنا العامر )

ما لاحظتوا ان كل اللي في المدونه بيتزوجون فجأه !!!

عاد كن امي الله يحفظها قاريه القصه ، دخلت علي في غرفتي متعلله بانها تبغى تلم خلاقيني

وترتب الغرفه اللي من زمان ما عمر احد فكر فيها

بدأت الوالده بالترتيب وطبعا مع بعض التعليقات

متى تتعلم يا ولدي الترتيب ؟؟؟

متى تهتم بالمكان اللي تنام فيه ؟؟؟ كيف يجي لك نفس تنام في هالحوسه ؟

طبعا كل هذا الكلام عارف ان وراه شي واكد نظرتي انها بدت تقرب من اكثر

امي : يا درايفر انت ما بيعدل حالك الا الزواج !!!

انا : هااااااه يمه ، وش تقولين ؟؟؟ زواج ، وش زواجه والعالم في هالظروف الاقتصاديه الحرجه

وبعدين العالم يمر بمنعطف خطير هالايام

امي : يا ولدي انت اعزم وبيغنيك الله ، وابوك ما هو مقصر معك ، وخل عنك منعطف وطلعه

بعدين ترى البنات ماهم بناطرينك طول اعمارهم

انا : يمه وانا وش دخلني في البنات ؟ اللي يسمعك يقول انا اخر رجال في العالم

امي : انت تعرف قصدي زين يا درايفر ،

انا : يمه يا ليت توضحين ، ترى ذا الباص ما خلاني اعرف افكر ، وبلاش الرمزيه

اللي علمك اياها ابوي ((( ماهو عاقل سلفادور دالي )))

امي : ترى عيال عمك ناوين يزورونا هاليومين والخبر انهم ناوين يملكون على اختك

بعد ما اتفق ابوك وعمك على كل شي ،عاد ابوك وصاني افاتحك في الموضوع

انا : والله يا امي الولد ما عليه ، اخلاق ووظيفه ، بس ان بغيتوا رايي لا تستعجلون

خلوات البنت تركد شوي

امي : وانت من جا يطلبك رايك الحين ؟

انا : افاااا ، توك تقولين ان ابوي مرسلك تفاتحيني في الموضوع يعني حسب الرمزيه اللي متعودين

عليها ، انه طلب منك تستشريني

امي : ما جيت استشيرك ، ولا باقي الا هي نستشيرك انت ،،،، ( تحطيم )

انا : اجل وش المطلوب مني ؟؟؟

امي : ابوك يقول يبغى يخطب لك بنت عمك ، وانا اشوف ان رايه زين

انا : هاااااه ، وش تقولين ؟؟؟!!!؟؟؟ يعني زواج بدل ، يعني مصالح مشتركه

واحنا اللي نروح فيها !! ما تعرفون ان زواج البدل ما يصلح ، ودايم يسبب مشاكل

امي : يا ولدي انت لازم تفهم انك اذا تزوجت بنت عمك بنضمن ان اختك يكون وضعها زين

مع ولد عمك ، وانت توك تقول البنت لازم تركد ، ونخاف الولد يروح من ايدينا

واذا راح بيقولون الناس ليه ما اخذها ولد عمها ، وبيعيدون ويزيدون في السالفه

عشان كذا لازم توافق على بنت عمك ، عشان اذا جو عندنا وفاتحونا نفاتحهم بموضوعك

ولا تكون عقبه في طريق سعادة اختك

انا : وش عقبه ما عقبه يمه ، هذا نتيجة المسلسلات اللي تقعدين عندها

كتبها درايفر ، في 17 فبراير 2008
الساعة: 13:55 م







ترى حطيت لكم درجات الحراره فوق الباص عشان تعرفون

اذا كنتم تبون تروحون مدارسكم والا لا وعشان تعرفون اني vip مو أي شي

(( شوي وتصير هالمدونه ليموزين باكستاني من كثر اللزقات يا الله تمشي ))

نعود لمحور حديثنا

احلى شي ان القصه بتخلص والى الحين ما عرفتوا اسم اختي ، صدقوني تبطون ما علمتكم

…

عوده لملاك وجعيفر

بعد ما بغا يخرب كل شي ويتفركش العرس ، قدروا الاطراف المتنازعه انهم يهدون الوضع

ويجمعون راسين ( وفي روايه شوشتين ،، وهي الاصح) بالحلال

وخلال هالفتره كانت ملاك غائبه عن الاحداث لانها مشغوله جدا

وطلبت مني ابلغكم لا احد يدق عليها لانها قاعده تحوس عشان تجهز لعرسها

بعد ما اعتذرت اغلب دور الازياء العالميه اللي في شوارع البطحا الخلفيه

عن تفصيل فستان عرسها ، لانهه مشترطه ان فستانها يكون ساتان مبطن بصوف لسببين :

الاول – العرس في الشتا

الثاني – تبي تشغل المكيف فوق راسها عشان لا يسيح المكياج

وتقول ملاك انها تبي تسوي حركه في العرس ، بتلبس مع الفستان نعال صوف اللي على اشكال حيوانات

بس محتاره تلبس ارنب والا بطه ، عاد الحين لا تزعجونها خلوها ترتب عرسها

……

جعيفر

المسكين الى الآن ما لقو له أي شي يفرد شعره ، جربوا معه جميع انواع الفرد

حتى انهم نقعوه في مويه مالحه وخل بطاطس لمدة اسبوع ما انفرد لهم الا شعرتين واذن

عاد اخر شي اتفقوا انهم يزرعون له راس هندي كامل …

…..

باسكال ..

الى الحين تجهز اغنيه خاصه للعرس ، وتقول انها بتصير مفاجأة الموسم

خصوصا ان اللي حط اللحن هو الفنان الكبير شعبان عبدالرحيم

….

دله ..

مخططه على محل مواعين وكل يوم تروح له ، عشان تبي تشتري هديه لملاك

بس الى الحين ما عجبها شي ، وتاليتها معروف

طقم قهوه وشاهي من محل ابو ريالين < << يا حبي له

….

سوسن …

اللي ماخذ عقلك يتهنى به !!!!!!!!

تصدقون فعلا رب ضارة نافعه ، هالبنت تغيرت حياتها 180 درجه بعد الحادثه الشهيره ..( ما هي عاقله ديانا ) ،

…..

درايفر …

على حطة ايدك ، ينتظر الفرج على ايدين المنقذه أم خليف اللي الى الحين ما ادري وش تحوس كل يوم لها فكره عن باصات مشروعها

مره تقول باحط لونها وردي ، مره فوشي ، مره فيروزي بشريطه ، مره احمر بلماع يا شين الفضاوه ….

………………



بقية مقابلة البرنسيسه نوفه

تفضلي يا برنسيسه

نوفه (( …. طبعا انا وقفت عند اني خطرت لي فكره خطيره مرررره عشان اوصل لابو سلطان

الشايب الغني اللي قررت اني اتزوجه ، بس انتم الله يهديكم ما خليتوني اكمل

بس اليوم باكمل ولا علي فيكم ، ما لقيتوا الا انا تقطعون كلامي ،

انا يوم اني فكرت في خطه عشان اوصل لعريس الغفله ، حطيت في بالي انه شايب ولا يرضيه أي شي

طبعا لانه خبره وعارف الدنيا عدل

يوم جات الفكره وطبختها في راسي ، قفلت باب غرفتي واخذت جوالي ودقيت على جوال ام سلطان

بها درايفر ، في 4 يناير 2008
الساعة: 17:19 م








بعد مداولات قادتها كوندليزا رايس ( باسكال ) قرروا البنات قبول العرض المقدم لهم من

مديرة المدرسه بالدراسه عن طريق المنازل

وطبعا كان هذا العرض مقدم لهم في عرس دلال ومحمد اللي كان عرس مختلف جدا

وراقي ، حضرته الفنانه ديانا حداد والفنان علي الحجار والفنانه سميه الخشاب

واللاعب الكبير هادي خشبه < << ما ادري وش جابهم ذا العرس اللي كنه عيد العمال

ما علينا ولا عليكم

اهم شي ان العرس سار على احسن حال وطارت دلال مع محمد الى كندا

…

الاميره نوفه قررت في خلال هذي الاحداث بدء حياتها بطريقتها الخاصه

طريقة الاميرات …ثقل ومصلحه وبزنس وعلاقات

كلنا استغربنا بقائها بجانب والدتها خلال ملكة ملاك و جعيفر حتى ان البعض قالوا

ان امها خايفه عليها لا تضيع في الزحمه ، والاسواء اللي قالت ان امها رابطتها من رجلها

في الطاوله عشان ما تتحرك

نترك الكلام لنوفه لتخبرنا الحقيقه عن ما حدث في ذلك اليوم

نوفه .. المايك معك ،، تفضلي طال عمرك

(( والله في الحقيقه والواقع اني ما كنت مربطه ولا شي ، بس هذي اشاعات المغرضين

و اعداء النجاح واللي على بالهم دمهم خفيف

انا كنت ارسم خطتي للمستقبل ، خصوصا بعد ما شفت ملاك طاحت هالطيحه القشرا مع جعيفر

اللي ما ادري وش لاقيه فيه

ناظرت الخشش والشوش اللي في العرس ، طبعا المتزوجات ، وطلعت في راسي فكره

اني اجمع معلومات عن العجايز اللي خششهم تسد النفس وباين عليهم اثار النعمه

اما الطفرانات فهذولي ما لقيت لهم بال

جات طاولتي انا والوالده في موقع استراتيجي قدرت اكشف منه كل الاحداث واشوف كل الشخصيات

وساعدتني وحده من الصبابات بعد ما عطيتها وجه وضحكت لها و عطيتها غمزه

صدقت عمرها الخبله و سنترت فوق راسي ، ما ينزل شي من المطبخ الا اكون اول وحده تذوقه

قهوه شاهي حلا معجنات خبز،،، شوي وتجيب لي القدر وتقول اغرفي

اهم شي انها ساعدتني في معرفة اسامي العجز الغنيات اللي حضروا العرس

والاهم من هذا كله اسامي ازواجهم الشياب < << فيس يرفع حواجبه

وخلال المده بين ملكة ملاك وعرس ودلال قدرت اجمع معلومات واسوي خطه قويه

عشان ابداء في تنفيذ مخططي في الزواج من شايب غني ومنتهي

طبعا خطتي كانت ادور شايب عنده فلوس زوجته عجوز وشينه ، عشان يكون مل منها

ويكون في نفس الوقت عنده مساحه من الحريه عشان اقدر العب عليه

وبالفعل لقيت نفسي قدام مجموعه من الشياب اللي جو على حسب خطتي

والحمد لله ما احترت في الاختيار ، لقيت ابو سلطان شايب وعنده شركه عقاريه

في الرياض و لها فرع في دبي ، كان هو انسب واحد لخطتي

اول شي عمره كبير يعني حوالي 80 سنه

ثاني شي ما عنده الا ولد واحد وهو اللي يدير الشركه في دبي ، وبنتين متزوجات

ثالث شي ما يسافر الخارج كثير وهذا يعني انه ما شاف بنات واجد يقدرون يغرونه

و يخربونه علي و تفشل خطتي

رابع شي عنده شوية مشاكل صحيه في القلب ، بس يمشي الحال

وطبعا زوجته عجوز وما هنا وجه على كثر الميك اب اللي حطته والالماس اللي لبسته…

يوم اجتمعت عندي كل هالمعلومات ، بديت انفذ خطتي و كان اصعب شي

هو كيف اوصل له ؟؟؟

فكرت ارسل له ايميل ، بس قلت ما بيقتنع وبيفهم اني العب ومخططه عليه

فكرت اقدم على وظيفه عنده في الشركه ، بس عرفت انهم ما يوظفون بنات

فكرت وفكرت وهم بعد فكرت الين بغى يطيح شعري من كثر الهرش

الين طلعت معي فكره خطيره ومجنووووووونه …..

.

ما هي خطة نوفه الخطيره؟؟؟

كيف ستنفذ خطتها ، وهي تقول انها خطيره؟؟؟

هل ستنجح خطتها في الايقاع بابو سلطان ؟؟؟

…

هذا ما ستعرفونه في الحلقة القادمة حين نستكمل بقية المقابلة

…..

في بيتنا العامر



اختي المهبوله : درايفر اخوي ، ابيك توديني لفيفا

كتبها درايفر ، في 2 نوفمبر 2007
الساعة: 18:41 م







في لحظات التفكير اللي تصيب الانسان والحيره اللي تخلي الواحد يحس انه تايه

جلس محمد يفكر في سوسن وفي حالتها وفي اللي سواه ، وكأنه تأنيب الضمير

لاول مره يزوره ، الشي اللي خلى راسه يصدع ولا يقوى على التفكير

في لحظتها فكر في صديق الجامعه ( خالد ) اللي كان له اراء واقعيه في الحياه

صحيح انها ما تتفق عادة مع آراءه ، لكن هي اقرب للواقع

اخذ جواله وطلب رقم خالد

خالد : هلا والله ومرحبا

محمد : هلا بك ، وين الناس يا القاطع

خالد : اللي يسمعك يقول مسنتر عند بابنا من الزيارات

محمد : اقل شي انا اتصل واسأل ، لكن انت لا سؤال ولا اتصال

يا اخي عذا التكاليف عطني رنه وانا ادق عليك ، والا احسن شي ترى الاتصالات

حاطين خدمة على حسابي ، اتصل وانا باستقبل المكالمه على حسابي

خالد : والله ما هي شينه ، تستاهل الواحد يجربها

محمد : ما علينا من كل هالكلام ، انا ابي اشوفك ، عندي كم شغله بغيت اقعد معك

واخذ رايك فيها ، وش عندك الحين ؟؟؟

خالد : ابد ما عندي شي ، وش رايك نتقابل بنفس المقهى العاده

محمد : لا ، ابي نروح لمكان غيره ، ابي اجلس معك برواحنا

خالد : والله شكل المواضيع خطيره ، يا الله شوف لنا مكان ، والا تدري انا امرك

ونطلع وفي الطريق نتفق على مكان ، بس من الحين على حسابك

محمد : لاتتأخر انتظرك

…..

وبالفعل كانت ربع ساعه ومحمد يجلس مع خالد في السياره متجهين الى احد المقاهي

وبعد ان وصولوا واختاروا لهم طاوله بعيده في احدى الزوايا

قال محمد اول شي نطلب طلباتنا لاني ما ابي احد يقاطعنا ، ووفقه خالد

وبعد اخذا الاخبار العامه وصلت القهوه

خالد : الحين اعتقد ان ما في شي بيقاطعك ، تفضل شوقتني اعرف

محمد : والله يا خالد ما ادري من وين ابدا ، لكن الموضوع انا افكر اتزوج !!!

خالد : هههههههههه ، حلو والله انك فكرت ، خصوصا وانت طبعت بطاقات الدعوه ووزعتها

دايم الناس الاذكيا يسوون زيك ، يطبع البطاقات ويحدد المكان وبعدين يتزوج واخر شي يحدد

البنت اللي بيتزوجها ، هههههههههههههه

محمد : ههههههههه ، اللخ يرج ابليسك ، انت ما فهمتني

خالد : تفضل فهمني ، ولا تقول ان البطاقات مطبوعه بالغلط

محمد : اسمع يا خالد ، انا حطمت حياة بنت كانت تحبني والحين ابي اصلح غلطتي !!!

خالد : هاااااه ، وش تقول ، وحده وحده ابي افهم ، ابي استوعب

محمد : مثل ما قلت لك ، كانت لي علاقه مع بنت وتعلقت فيني لدرجة انها يوم درت اني

خطبت وبتزوج جاها انهيار وانشلت بس الحمد لله عدت على خير

والحين البنت ما تقدر تمشي الا على عكاز ، وانا احس اني انا السبب فب اللي صار

وابي اصلح غلطتي واتزوجها

خالد : طيب وزوجتك ، اقصد اللي بتصير زوجتك بعد كم يوم ؟؟

محمد : هذا هو اللي ذابحني ومخليني ما اقدر افكر ، ابي رايك

خالد : طيب انت وش في تصورك ، وش حطيت في بالك انك تسوي ؟؟؟

محمد : دام باقي ما صار بيننا شي ، باطلق

خالد : مجنون انت ، تصلح الغلط بغلط اكبر

محمد : يا اخي باقي ما دخلت عليها ولا بيننا عيال ، واحسن من الحين ولا اعيش

في عذاب الضمير ، خصوصا وانا الحين صرت افكر في البنت ليل نهار

خالد : شوف يا ابو ضمير انت ، اللي صار صار وانتهى وبنت الناس ما اعتقد انك تشوفها

لعبه عندك ، تطلقها عشان تصلح عشان غلطتك ، وش ذنبها هي اذا انت اخطيت ؟؟

وش بتكون نظرة الناس لها اذا تركتها ؟؟ اقل شي بيقولون ما تركها الا وفيها شي

فكر بعقلك ولا تخلي العاطفه اللي توها تطلع الحين تعمي عيونك

محمد : طيب في نظرك وش اسوي ، اتزوجها مسيار ؟؟؟

خالد : تتزوجها وانت تدري انك مسافر بعد كم يوم ويا عالم كم بتقعد ، وتصير البنت

مثل الوقف ، ما هو حل

محمد : طيب وش اسوي عشان ارتاح يا خالد ؟؟، من جد ترى راسي بيتفجر من التفكير.

خالد : تبي حل في نظري يكون احسن لك ولها ؟؟؟

كتبها درايفر ، في 23 سبتمبر 2007
الساعة: 01:12 ص







كل حريم الحاره متجمعين في ملكة ملاك وعيونهم كالعاده متسمره

تنتظر وصول ملاك اللي تثيقل عشان ما احد يقول عنها مطفوقه وما صدقت

وفي نفس الوقت لانها بدت تشعر بشيء من الازعاج في راسها من اسم جعيفر

كانت تفكر في طريقه تخليه يغير اسمه ، والادهى من كل هذا انها صارت تفكر

له في اسم يليق فيه ،، كانت تقول في نفسها..

لو سميناه هشام ما سلمنا من ذا البنات بيقعدون ناشبين لي فيه

ولو سميناه براد بيت احسه يليق على دله مو علي ،،، براد ودله

طيب لو سميناه وائل كفوري ما تمشي هو و ذا الفاليف على راسه

يوووووووه يا ربي وش اسميه

احسن شي اسميه سعد زغلول ، اسم له رنه ، صدق كنه معسل صعايده

لكن ما يعرفونه ذا المشافيح اللي برا

قطع تفكيرها دخول امها تقول لها اخلصي انزلي الناس ينتظرونك

وفي القاعه كل العيون تراقب الدرج حين انطفت اللمبات وتركز ضوء ابيض

على اعلى الدرج مع صوت موسيقى هادئه جدا

وفي لحظة الترقب والصمت كانت ملاك تقف في اعلى الدرج بفستانها الوردي

وتسريحتها التي اخذت شكل برج الفيصليه وعلى نغمات موسيقى بينك بانثر

بدأت في النزول خطوه خطوه ، وفي نفسها كانت تقول :

تخيلي يا ملاك الحين لو تطيحين على وجهك قدام ذا الحريم ، والله يا هم بيضحكون

ويتشققون عليك من الضحك ، اقول ابعدي هالوساوس من راسك وناظري

دربك زين ،، اهاااا اشوف البنات كلهم هنا موجودات

ازين خلني اقهرهم شوي ، الله لو ادخل الحين واشوف اللي بقلوبكم

هذيك هناك دله تتهامس مع باسكال

وهذيك اللي هناك جنب امها يا ربي وش اسمها ، وش اسمها ؟؟

ايه ذكرت ، نوفه ، بس وش فيها لازقه جنب امها كذا ؟؟

اقول ، انطمي وصلنا خلاص ، الحمد لله ما طحت

…

في حوش بيت ابو جعيفر كان جعيفر في صدر المجلس لا بس البشت

وشوشته تدف الطاقيه وكأنها تريد التحرر من هذا الثقل اللي خنقها

كانت جلسته تدل على القلق اللي راكبه من راسه الى اخمص قدميه < < تعرفون معنى اخمص علموني

اكيد انكم تدرون ليه …

عشان ما نطول بالسالفه وبعضكم يقرا وهو صايم وما فيه حيل يفكر

كان الولد يبيهم ينادونه بسرعه عشان يدخل ويلبس عروسته الدبله

والغوايش والحلقان ويعطيها العلكه اللي جابها لها هديه من البقاله

.

مر الوقت ثقيل على قلبه بينما كان الوقت يمر بسرعه على ملاك اللي تطالع في الحريم

بنص عين ،

ملاك ( في نفسها ) : ادري انكم تهامسون وتغامزن علي يا بنات الذين

وادري انكم مقهورات بعد عشاني اخذت احلى جعفوري بالعالم

يووووووه يا ربي ، وش هالاسم اللي بيجيب لي القرف ، حتى دلع ما يتدلع

احسن خله كذا ، عشان العين والحسد ، ما احد يامن الحريم .

وبعد مرور ساعه قاموا البنات يسلمون عليها ويباركون في اللحظه اللي نادتها

امها عشان تدخل لان جعيفر بيدخل يلبسها الدبله

دله : الف الف الف مبروك يا قلبي ، الله يوفقكم

ملاك : الله يبارك فيك ، شفتي وش لون جابه الزمن

باسكال : الف مبروك وتستاهلين كل خير

ملاك : الله يبارك فيك ، وش رايك تغنين لي ( يا دبلة الخطوبه )

دله : الا وش ذا التسريحه ، انتي ما تبطلين تقليعاتك ؟؟

ملاك : ابي ابهرهم ، شوفي وش لون منبهرات ، بس يا اختي ذا العيدان

خرقت راسي ما ادري كيف ثبتتهم ذا الخبله

دله : اما انك ابهرتيهم فاللهم يا كافي ، مبهورات من اول وتالي يا المطوعه

باسكال : مو كن وجهك سامن عن يوم شفتك؟؟ والا انا اتوهم ؟؟

دله : لا والله الا سامن بقوه ، وش السالفه ؟؟

ملاك : اسكتوا لا احد يسمعكم ، هذا مكياج جديد اسمه طبقات ، ابد زي عصير الطبقات

يخلي الوجه يمتلي ، بس الله يعينك على شيلته بعدين ، يبي لك سكين وشوكه ويا الله

ما يصلح لكم لا تسوونه

تبها درايفر ، في 9 سبتمبر 2007
الساعة: 19:56 م








غرفة مديرة المدرسه ( الاستاذه نجوى )

بعد ان استدعت الاستاذه نجوى مديرة المدرسه الابله تماظر مدرسة الرياضيات

والابله مريم مدرسة اللغه العربيه وجميعهن مشهود لهن بالخبره في التدريس

والتعامل الصارم مع الطالبات

كان في بال كل وحده منهم موال يختلف عن ظروف هذا الاجتماع الطارئ

ابله تماظر: خير يا استازه نجوى ، ايه الحاجه المهمه اللي ناديتينا عشانها

الاستاذه نجوى : طبعا انا كلفتكم بالفصل اللي هبل فينا كل هالسنين ، وانا ملاحظه

انهم ما داوموا وشكلهم ما يبون يداومون

ابله تماظر : أطعوا و أطعت سيرتهم ، دول جابوا الهم وطلعوا الشيب فينا

ابله مريم : والله ما مر علي في حياتي مثلهم ، هذولا مصيبه مو طالبات

ياني تمنيت انهم طولوا معي هالسنه ، والله لا اربيهم من اول ، بس خير

وش جاب سيرتهم الحين؟؟

الاستاذه نجوى : ذولا بنات وعشرة عمر ، على كثر ما فيهم من هبال الا والله انهم طيبات

وقلوبهم بيضا وينحبون ، صدق السنتهم طوال ، بس وش نقول عاد مراهقات

ابله تماظر : مراهقات ازي ، دول اكبر مني

الاستاذه نجوى : ما علينا من هالكلام كله ، انا اجتمعت فيكم وابي اخذ رايكم في موضوعهم

ابله مريم : خير ان شاء الله وش تبين تسوين لهم ، ارفعي ملفاتهم للوزاره تفصلهم

الاستاذه نجوى : لا ماني رافعه ملفاتهم ، انا ابي اسوي فيهم خير

وان نجحوا والا عاد بكيفهم نكون سوينا اللي علينا

ابله مريم : وش لون بتسوين فيهم خير يا استاذه وهم غايبين ولا همهم المدرسه

ابله تماظر : ان شاء الله ربنا حايجازيكي بالخير و يديك على اد نيتك يا استازه

بس ممكن تشرحي لنا حتعملي ايه ؟ وازاي ؟

الاستاذه نجوى : انا كنت امس سارحه وافكر في سوسن المسكينه وحالتها اللي وصلت لها

وفكرت بعد في باقي البنات ، يعني حرام يتدمر مستقبلهم وهم طايشات

لازم احد يوقف جنبهم ويفهمهم ان الحياه ما هي لعب وبس ، وبالصدفه جا زوجي

وسألني وش افكر فيه ، قلت له على الموضوع ، فاقترح اننا نساعدهم باللي نقدر عليه

ونكسب فيهم ثواب ان افلحوا والا لا

عاد انا فكرت في انا نحولهم الى نظام منازلي ونساعدهم بقدر المستطاع في الاختبارات

ونحسب المده اللي راحت كأنهم منازلي ولا هم غايبات ، وش رايكم؟؟؟

ابله تماظر : انتي عظيمه يا استازه نجوى ، انا ما عنديش مانع

ابله مريم : الله يجزاك خير ، فكره معقوله ، بس وش لون بتوصلين لهم الفكره

الاستاذه نجوى : وصلتني دعوة لزواج وحده من طالباتنا ، دلال تذكرونها

واعتقد ان اغلب الشله يعرفونها وبيحضرون عرسها ، هناك عاد بيكونون رايقات

وان شاء الله اقدر ابلغهم ، لو بس وحده منهم وتبلغ الباقيات

واذا ما قدرت بابلغ امهاتهم وهم عاد بكيفهم ، عقولهم في روسهم .

.

وافقت ابله تماظر وابله مريم على فكرة الاستاذه نجوى واتفقوا على انهم بيساعدون

باللي يقدرون عليه وبعد ان استاذنوا من غرفة المديره متجهات الى غرفة المعلمات

دار بينهم حوار صغير عن فكرة الدروس الخصوصيه

واتفقوا على بذل اقصى جهد لاقناع الطالبات بقبول فكرة الدراسه من المنازل

.

.

غرفة الاميره

ام نوفه : يا بنت يا نوفه قومي خلاص كفايه نوم

نوفه ( تتمغط ) : يمه خلوني نايمه وش تبون فيني ، خير وش ذا الازعاج ، وش تبون؟

الام : يا بنتي قومي البسي لك شي زين ، وحطي على وجهك مكياج واكشخي خلينا نروح

الملكة ،

نوفه : ملكه !!!! وش ملكته ؟؟ من بيتزوج ؟؟ ومن هي العروس ؟؟؟

الام : ابد يا طويلة العمر ، ملكة باريس هيلتون ، قومي واذا رحنا عرفتي

نوفه : يا حظنا بنروح لامريكا ، ضنك يمه يمديني اروح المشغل ازين عمري ؟؟

الام : قومي عاد ، صدق انك ما تنعطين وجه ، بتقومين والا اروح واخليك ؟؟

نوفه : طيب يمه باقوم ، بس ابي اعرف ملكة مين بالظبط ؟؟

الام : والله اني ما اعرفهم ، بس ابوك لزم الا نروح لان ابو البنت صديقه

يقول اسمه ابو ملاك .

نوفه : ملاك !!! ما غيرها ؟؟؟

كتبها درايفر ، في 31 أغسطس 2007
الساعة: 13:32 م







في بيت ام خليف

مرت ثلاثه ايام على حادثة القصر المهجور واللي اكتشفت فيها ان سندريلا

كانت مسحوره فعلا والسحر موضوع لها في الخاتم اللي كانت تلبسه بدون ما يشوفه احد

كانت علامات الاستفهام حول من اللي حط لها السحر ؟؟ والسواق وين راح ؟

بعد ما رجعت ام خليف لبيتها واعتنت بها الشغاله كنت انا ساكن بغرفة السواق

لاني خلاص مطرود من بيتنا ولا عندي فلوس عشان ادوج بالباص

عموما كانت ريحة الفكس هي العلامه الفارقه في الغرفه اضافه الى صور شغالات واجد

كنت اتمنى في كل الاوقات ان تكون الظروف خدمتني وتوافق ام خليف خصوصا اني صرت اشوف

نفسي قدامها صرت زورو وروبن هود وجاكي شان وكل شي

بدا قلبي يدق بسرعه مع رنة جوالي و ام خليف تدق علي

انا : هلا والله

ام خليف : اهلين ، انته فينك ؟؟ هيا تعال بسرعه ابغاك

انا : الحين اجيك

قفلت الخط وبسرعه الى داخل البيت حيث كانت تنتظرني سندريلا ، ومن عند الباب اخذت فردة كعب

قلت اسوي زي القصه واشوف بتلطع مقاسها ونتزوج بعدها

في الصاله كانت تنتظرني ام خليف وحاطه قدامها قهوه وشاهي وعصير وحلى ومكسرات

ام خليف : تفضل يا ولدي

انا : ولدك ، رجعنا لسالفة ولدك ، ما اتفقنا ننساها

ام خليف : ما هو هادا الشي اللي ناديتك عشانو

انا : ناديتيني عشان تقولي يا ولدي

ام خليف : لا ، ناديتك عشان افهمك ايش اللي صاير واللي حيصير

انا : تفضلي فهميني لو سمحتي

ام خليف : شوف يا ولدي يا درايفر ، انته صح انقزتني من الهباب اللي كان مصلحوا ليه

جوزي اللي مات الله لا يرده

انا : زوجك !!!

ام خليف : ايوه لاتستغرب ، جوزي قبل لا يموت اداني الخاتم اللي انته رميتو في المويه

شكلوه عشان ما اتجوز من بعده

انا : اهااا ، اجل عشان كذا ، طيب السواق وين راح ؟ والا ما تدرين ؟

ام خليف : الا ادري ، السواق هرب لمن عرف ان الموضوع اتكشف خلاص

لانو هادا السواق كمان جابو جوزي وهوا صديق عمرو الله يخدهم اتنينهم

انا : خلاص اخذهم وراحوا ، طيب الحين ، ابغا افهم عني وعنك انتي

ام خليف : شوف يا ولدي

انا : لاتقولين ولدك ، مليون مره قلت لك لاتقولينها

ام خليف : طيب ، شوف يا درايفر ، انته صراحه ما قصرت معايه ، الله يحفظك

وعشان كذا انا كمانه ما راح اقصر معاك ، لكن موضوع الجواز ( الزواج ) ابغاك تنساه

انا : وش لون انساه ، وانتي وعدتيني ، ووديتيني مشوارك اللي اخذ نص عمري

وطلع الشيب براسي

ام خليف : احنا لازم نفكر في الموضوع صح ، انا اكبر منك بكثير ، وما ابغا الناس تقول

اخدت واحد اصغر منها ، انته تعرف كلام الناس ، بعدين انته لسه العمر قدامك

ولازم تتجوز وحده من سنك عشان تعيش معاها وتفهمك وتفهمها ، مو تاخد وحده اكبر منك

انا : طيب انا اخترتك انتي ، مو شرط الا اخذ وحده في سني

ام خليف : شوف انا فهمتك وقلتلك كل شي ، وانته كمان لا زم تفهمني وتقدر وضعي

وانا مستعده اجوزك البنت اللي تختارها واساعدك بكل شي

انا : يعني هذا اخر كلام عندك ؟؟

ام خليف : والله هادا كل اللي عندي وحيجي يوم تفهم اني معايه حق

انا : طيب ، مع السلامه ، انا ماشي

ام خليف : فين رايح يا واد ، اقعد اشرب القهوه والشاهي

انا : لا خلاص ما عاد لها طعم

ام خليف : هيا لا تسوي لي فيها زعلان دحينه ، خليك عاقل

انا : خلاص ، مع السلامه ،

وخرجت من بيت ام خليف وانا ازعل شي العالم ، يعني الحين خسرت كل شي

كيف اروح لبيتنا ، وش اقول لهم ، كيف اقابل العيال وانا

كتبها درايفر ، في 17 أغسطس 2007
الساعة: 15:16 م







صدمه في بيت باسكال



باسكال : مشاعلووووه يا اللي ما تستحين افتحي الباب

مشاعل (بصوت مرعوب) : وش فيك علي ؟ وش سويت لك ؟

باسكال : اقول افتحي الباب بسرعه يا قليلة الحيا

مشاعل : ماني فاتحه ، اول قولي لي وش سويت ، وش تبين مني؟

باسكال: افتحي البااااااااااااااااااااب لاكسره الحين ، والله لو ما فتحتي

ان يجيك يوم ما عمرك شفتيه بحياتك ، انا اوريك

مشاعل ( تبكي ) : اول قولي وش سويت ، يا ربيه والله ما سويت لك شي

باسكال : افتحي الباب وبلا فضايح ، لاتخليني انادي ابوي وامي واعلمهم

مشاعل : طيب بافتحه بس بدون طق ، تفاهمي معي و علميني وش سويت

باسكال : افتحي يا حيوانه بسرعه

فتحت مشاعل باب الغرفه وبسرعه دخلت باسكال و ……

طراااااااااااااااااااااااااخ بكف على وجه مشاعل خلاها تنسدح على السرير

قفلت باسكال الباب واتجهت لشوشة مشاعل تسحبها وتردد كلمات

يا حيوانه ، يا قليلة الادب ، ياللي ما تربيتي ، والله لاربيك

كانت مشاعل غير مستوعبه للموقف وحتى محاولة الدفاع عن نفسها لم تفلح

في ابعاد باسكال ولا اسكات غضبها الا انها بدت تصرخ محاوله الابتعاد

في هذا الوقت سمعت الام بنتها تصرخ فاتجهت مسرعه لغرفة مشاعل

لتجد الباب مغلق امامها

الام : يمه مشاعل وش فيك ، فكي الباب ،،، وسمعت صوت باسكال

مشاعل : آآآآآه يمه لحقي علي ، بتذبحني

الام : باسكال ، افتحي الباب ، وش فيكم ؟؟ وش صاير ؟؟؟

فتحت باسكال الباب وهي تمسك بشعر مشاعل التي اجهدت من التكفيخ والبكا

دخلت الام وسحبت مشاعل في حضنها وقفلت الباب

الام : بس يا حبيبتي ، بس يا قلبي ، خلاص يمه مشاعل

مشاعل : يمه بغت تذبحني ، وانا ما سويت لها شي

باسكال : ما سويتي شي يا اللي ما تستحين ، والله لاذبحك ، فكيها يمه تكفين

الام : لا ماني فاكتها ، وطي حسك لايسمعنا احد ، زين ابوكم واخوكم ماهم فيه

باسكال : انا ما جيت الا بعد ما تاكدت انهم طلعوا ، والا لو درا ابوي وش سوت

والله ان يذبحها

الام : بسم الله على بنيتي ، وش سوت ، علميني ؟؟

مشاعل : يمه والله والله ما سويت شي ، والله ما سويت شي

باسكال : بنتك الدلوعه ماخذه صورة بنت الناس وقاعده تغازل بها زوجها

الام : هااااه ،، وش ذا الكلام ، وش ذا اللي تقولينه ؟ صورة من ؟

باسكال : بنتك ماخذه صورة دلال وحاطتها في الماسنجر وقاعده تغازل

محمد خطيبها ، تبي توقع بينهم

الام : وش الماسنجر هذا وكيف تحط صورتها ؟؟

باسكال : يمه من الكمبيوتر ، اخذت صورة البنت مدري من وين جابتها

وحطتها يعني انها هي دلال ، وراحت تكلم محمد خطيب دلال وتحط له الصوره

عشان توقع بينهم اللي ما تستحي

الام : انتي من صدقك تقولين ذا الكلام ، مشاعل ، صدق هذا اللي تقوله اختك ؟؟

مشاعل : انا مالي شغل يمه

باسكال : مالك شغل يا اللي ما تربيتي ، اجل من اللي له شغل ، اضن بتقولين

دلال جات لغرفتي ودخلت من جهازي تغازل زوجها ، والا انا اضني سويتها وجايه

اتبلاك

مشاعل : انا مالي شغل ، جواهر اختها هي اللي قالت لي !!!!!!

باسكال : هاااه !! وش تقولين ؟؟ وجواهر ليه تبغا تخرب على اختها ؟؟

بعد ما بغيتي تخربين على الكبيره جيتي للصغيره ؟؟ وش بينك وبينها ؟

مشاعل : والله هي اللي قالت لي ، اصلا هي زعلانه لان البنات صاروا

يعايرونها باختها ويقولون خطافة الرجاجيل ، وانشروها في المدرسه

و حتى بعد تهاوشت مع دلال وقالت لها هالكلام ، بعدين عطتني صورتها

وقالت ابيك تدخلين وتلعبين على خطيبها من دون ما يدري ، ابي اوقع بينهم

الام : لا يا اللي ما تستحون

باسكال : وانتي وش يخصك بالسالفه ، البنت واختها بكيفهم بقلعتهم

انتي ليه تتدخلين ، الحين لو درت دلال وانكشف الموضوع وعلمت ابوها

وجا علم ابوك ، علميني وش بتسوين ساعتها ، والا لو تمت خطتكم يالهايتات

كتبها درايفر ، في 10 أغسطس 2007
الساعة: 23:05 م







جمعة البنات

في بيت باسكال تجمعت شلة البنات المعتاده وبزيادة عضوتين توهم طازه

الاولى اكيد عرفتوها وهي ملاك والثانيه هي مفاجأة باسكال اللي وعدت

فيها البنات وتوها باقي ما وصلت

الموجودات حاليا في الجمعه

باسكال صاحبة الدعوه ،دله العقل المدبر وملح الجلسه ، ليندا اخت باسم الدب

يا حليلها من زمان ما شفناها ، سوسن بطلتها الجديده

اختي ما هي معهم لانها بغت تسوي فيها و قفل عليها ابوي في غرفتها

الشيخه جايه تقول ابغا اصير اول امرأة تتسلق قمة برج المملكه ومجهزه العده

جايبه حبال ولوحه كبيره كاتبه فيها اسمها تقول بتعلقها فوق وسطل بويه

تقول بتكتب ذكريات في اعلى البرج

كان تخطيطها انها تطلع يوم الخميس في وقت الذروه عشان يصورونها وتشتهر

عاد ابوي قال معصي ما تروحين يوم الخميس لو قلتي الجمعه الصبح اقول ما يخالف

ما فيه زحمه والناس نايمه ويمديك تكتبين براحتك

الاخت اصرت على رايها مصدقه ان ابوي بيخليها تروح ، قفل عليها وخلها في غرفتها

و كان همها الوحيد الآن هو النمل اللي تربيه في الحوش

هذي البنت ما ادري من وين تجيها هالافكار ، احد يربي نمل ، لا ومن زود الهبال

مسميتهم وكل نوع مصلحه له مستعمره ، اللي حافرة له بالجدار واللي حاطه له رمل

واللي كاسره بلاط الحوش ومخليه بيته تحت ،، ما علينا

جمعة الشله كانت بدايتها تعارف على العضوه الجديده ملاك اللي باين انها بتاخذ

الجو الان خصوصا بعد ما انتشر خبر الموقف اللي سوته قدام الحريم

ولكن في نفس الوقت كان تفكير ملاك في الحب الملحوس اللي بلت نفسها فيه

طلبت من البنات التفكير في خطه لتسحيب جعيفر على وجهه

وبالفعل بدت الافكار ، تجيها من كل صوب

في وسط الهذره واصوات الازعاج وكل وحده تبي تسبق الثانيه بالكلام

واصوات البيالات والمكسرات وطرقعة الاصابع وصوت التلفزيون واي شي فيه صوت

مرتفع تتخيلونه موجود الآن بينهم

في وسط هذه المعركه الصوتيه المزعجه دق جرس الباب اكثر من 10 مرات في دقيقه

قامت باسكال وهي تقول شكلها المفاجأه اللي قلت لكم وصلت

سبحان الله انقطع الازعاج بدون مقدمات حتى اللي كان في حلقها كلام الدنيا كله سكتت

وعيونهم على الباب

باسكال : هلا والله وغلا ، هلا بالنور كله

نوفه : هلا بك انتي يا قلبي ، وش ذا يا اختي ساعه لين تفتحون الباب

باسكال : يا حبك للتهويل ، توك مالك دقيقه عند الباب ودقيتي الجرس 20 مره

نوفه : متحمسه يا اختي ، لا يكون فاتني شي

باسكال : لا تونا بدينا ، تفضلي حياك

ومسكتها من يدها واتجهت بها الى حيث تقف الان شلة البنات في انتظار وصول المفاجأه

باسكال : اعرفكم على اخطر عضوه منظمه للشله ، نوفه

نوفه : عاد مو لهالدرجه ، صدق اني خطيره بس لا تخرعينهم

دله : هلا والله ، حياك ، معك اختك دله احلى قهوه وحلى تراه انا اللي مزينتها

ليندا : اهلين خيتو ، انا ليندا ، بدك زيت زيتون بوصي الماما تجيب لك ، ههههههه

ملاك : يا هلا والله ، انا ملاك وتراني جديده بعد مثلي مثلك

سوسن : هلا والله بالنور كله ، اعذريني يا قلبي ما اقدر اوقف

نوفه : الله يسلمكم جميع ، والله اني مدري وش اقول

باسكال : تفضلوا ارتاحوا وش فيكم واقفين

كل وحده من البنات تبي تاخذ نوفه جنبها الا انها اصرت انها تجلس بجنب سوسن

وقالت : باختصار ماني ماخذه مكان احد

وبدون مقدمات رجعت الهذره والقرقه وانواع الازعاج

بعده بدت الاسئله تطيح على راس نوفه من كل جهه ، حتى اللي تسأل سؤال

ما يمديها تسمع اجابته الا وهي سائله بعده عشره

دله : نوفه وين ساكنه ؟؟بحارتنا ؟؟ والا بعيد ؟

نوفه : لا ابد بالحاره اللي بجنبكم ، لكن مدري ليه احب حارتكم

باسكال : يمكن لاني فيها

نوفه : يمكن لانكم كلكم فيها > > > الله من النصب

ليندا : شو بتعملي ؟ يعني بتدرسي والا موزززفه والا شو ؟

وكذا انتهينا

ـبآـركـــــــــ الله فيكــ

ويعطيكـــــــ مليوؤوؤون عآفية

مشكوووووووووووووووووووووووووووووووووووووووور

شكرااااااااااااااااااااا